1. PROTEZZJONI TAD-DATA
L-EU-OSHA tirrispetta l-privatezza tal-kandidati tagħha u tipproċessa d-data personali tagħhom kif meħtieġ mir-Regolament (UE) Nru 2018/1725. Dan japplika b’mod partikolari għall-kunfidenzjalità u għas-sigurtà ta’ din id-data. L-informazzjoni personali li l-EU-OSHA titlob mill-kandidati fil-kuntest ta’ proċedura tal-għażla se tiġi pproċessata f’konformità mad-dikjarazzjoni tal-protezzjoni tad-data dwar il-Proċeduri ta’ Għażla u ta’ Reklutaġġ.
L-applikanti għandhom jingħataw aċċess għad-data personali kollha tagħhom ipproċessata fi proċedura tal-għażla. B’mod partikolari, is-suġġetti tad-data għandhom jingħataw aċċess għar-riżultati tal-evalwazzjoni tagħhom mill-istadji kollha tal-proċedura tal-għażla (preselezzjoni, intervista u testijiet bil-miktub), sakemm ma tkunx tista’ tiġi applikata l-eċċezzjoni kif speċifikata ulterjorment fl-Artikolu 6 tal-Anness III għar-Regolamenti tal-Persunal.
Din l-eċċezzjoni tista’ timplika li l-aċċess ma għandux jingħata, la għad-data komparattiva li tikkonċerna applikanti oħrajn (riżultati komparattivi) u lanqas għall-opinjonijiet individwali tal-membri tal-Kumitat tal-Għażla.
2. RIMEDJI ĠURIDIĊI
Kandidati li ma ġewx ammessi għall-proċedura tal-għażla
Talba għal rieżami
Kandidat li jħoss li jkun sar żball relatat man-nuqqas ta’ ammissjoni tiegħu għal proċedura tal-għażla speċifika (jiġifieri l-kandidat ma jissodisfax il-kriterji ta’ eliġibbiltà ddikjarati fl-avviż ta’ post battal), jista’ jitlob li l-applikazzjoni tiegħu tiġi kkunsidrata mill-ġdid billi jibgħat, fi żmien 5 ijiem kalendarji (li jibdew xahar wara d-data tal-għeluq għall-applikazzjoni), talba għal rieżami, billi jikkwota n-numru tal-proċedura tal-għażla kkonċernata, indirizzata lill-President tal-Kumitat tal-Għażla preferibbilment bil-posta elettronika: recruitment [at] osha [dot] europa [dot] eu.
Il-Kumitat tal-Għażla jerġa’ jikkunsidra l-applikazzjoni u jinnotifika lill-kandidat bid-deċiżjoni tiegħu fi żmien 10 ijiem xogħol minn meta jirċievi t-talba.
Ilmenti
Jekk il-Kumitat tal-Għażla jikkonferma d-deċiżjoni inizjali li ma jaċċettax il-kandidat għall-proċedura tal-għażla, il-kandidat jista’ jressaq ilment skont l-Artikolu 90(2) tar-Regolamenti tal-Persunal, indirizzat lid-Direttur Eżekuttiv tal-Aġenzija Ewropea għas-Sigurtà u s-Saħħa fuq il-Post tax-Xogħol, preferibbilment bil-posta elettronika: recruitment [at] osha [dot] europa [dot] eu.
L-ilment għandu jitressaq fi żmien 3 xhur mill-wasla tan-notifika tad-deċiżjoni lill-kandidat. Id-Direttur Eżekuttiv għandu jinnotifika lill-kandidat bid-deċiżjoni motivata tiegħu/tagħha fi żmien 4 xhur mid-data li fiha jkun tressaq l-ilment. Jekk, fl-aħħar ta’ dak il-perjodu ma tkun ġiet riċevuta l-ebda tweġiba għall-ilment, dan għandu jitqies li jikkostitwixxi deċiżjoni implikata ta’ ċaħda, li kontriha jista’ jitressaq appell skont l-Artikolu 91 tar-Regolamenti tal-Persunal.
Jekk l-ilment jiġi rifjutat, skont l-Artikolu 270 tat-Trattat dwar il-Funzjonament tal-Unjoni Ewropea u l-Artikolu 91 tar-Regolamenti tal-Persunal għall-Uffiċjali u l-Kondizzjonijiet tal-Impjieg Applikabbli għall-Aġenti l-Oħra tal-Unjoni Ewropea, kandidat jista’ jiftaħ kawża quddiem:
Il-Qorti Ġenerali tal-Unjoni Ewropea
Rue du Fort Niedergrünewald
L-2925 il-Lussemburgu
Huwa possibbli wkoll li jitressaq ilment quddiem l-Ombudsman Ewropew skont l-Artikolu 228 tat-Trattat dwar il-Funzjonament tal-UE u f’konformità mal-kundizzjonijiet stabbiliti fid-Deċiżjoni tal-Parlament Ewropew tad-9 ta’ Marzu 1994 rigward ir-regolamenti u l-kundizzjonijiet ġenerali li jirregolaw it-twettiq tal-obbligi tal-Ombudsman (ĠU L 113, 04.05.1994).
Ilment bħal dan għandu jiġi indirizzat lil:
Ombudsman Ewropew
1 Avenue du Président Robert Schuman
CS 30403
F- 67001 Strasbourg Cedex
Jekk jogħġbok innota li l-ilmenti mressqa quddiem l-Ombudsman Ewropew m’għandhom l-ebda effett ta’ sospensjoni fuq il-limiti ta’ żmien stabbiliti fl-Artikoli 90 (2) u 91 tar-Regolamenti tal-Persunal. Jekk jogħġbok innota wkoll li, qabel ma jippreżentaw ilment quddiem l-Ombudsman, il-kandidati jridu jkunu ssottomettew ilment lill-EU-OSHA skont l-Artikolu 90(2) u rċevew tweġiba negattiva.
Il-kandidati ammessi għall-proċedura tal-għażla iżda esklużi f’xi stadju aktar tard
Il-kandidati li jkunu ġew ammessi għall-proċedura tal-għażla, iżda li jkunu ġew esklużi fi stadju aktar tard, eż. kandidati mhux mistiedna għal intervisti/testijiet, kandidati li ma jkunux għaddew fl-istadju tat-test/tal-intervista, u fl-aħħar mill-aħħar, kandidati mhux inklużi fil-lista ta’ riżerva, ma jistgħux jitolbu rieżami tad-deċiżjoni tal-Kumitat tal-Għażla li teskludihom mill-proċedura tal-għażla, iżda jistgħu jagħmlu użu mill-proċeduri previsti fl-Artikolu 90(2) u 91 tar-Regolamenti tal-Persunal. Il-kandidati jistgħu wkoll iressqu lment quddiem l-Ombudsman Ewropew kif spjegat hawn fuq.
Jekk l-ilment jiġi rifjutat, skont l-Artikolu 270 tat-Trattat dwar il-Funzjonament tal-Unjoni Ewropea u l-Artikolu 91 tar-Regolamenti tal-Persunal għall-Uffiċjali u l-Kondizzjonijiet tal-Impjieg Applikabbli għall-Aġenti l-Oħra tal-Unjoni Ewropea, kandidat jista’ jiftaħ kawża quddiem:
Il-Qorti Ġenerali tal-Unjoni Ewropea
Rue du Fort Niedergrünewald
L-2925 il-Lussemburgu
